Astebete baina gutxiago falta da espedizioa hasteko. 127 Jzioquitarrak prest ditugu eta, azken asteetan ikusi moduan, baita lan taldeko kideak ere! Motxilan ixteko falta diren azken gauzatxoak, urduritasuna, azken uneko zalantzak…. denak aski arruntak hilabeteko espedizio nomada baten aurretik.

Astelehenean, uztailak 1, Atharratzen batuko gara. Bilbo, Gasteiz eta Donostiatik goizean goiz abiatuko diren autobusek, Nafarroa, Lapurdi, Behe Nafarroa eta Zuberoako gazteak jaso eta 12:30ean egingo dugu espedizioari elkarrekin hasiera emateko. Euskal Herriko eta diasporako 127 gazte, 30 lan taldeko kide, ia 400km luze aurretik, 27 herri eta beste hamaika eduki ezagutzeko. Eta den-dena, euskaratik eta euskaraz! Beste behin izugarria izango da!

Orain arte egindako lanaren babesa da EuskarAbenturak UNESCOren 2024ko  babesletza jaso izana. Ez da lehen aldia, 2020. urtean ere jaso genuen aitortza. Horrelako errekonozimendu zein sariek lanean jarraitzera animatzen gaituzte.

Zenbait datu

            Nortzuk: Errealitate linguistiko, sozial, ekonomiko eta kultural anitzekoak dira gazte parte hartzaileak. Gehiengoa bizkaitarra da, 43 gazte (%33,85), gipuzkoarrak 28 dira(%22,05), Nafarroatik 24 etorriko dira (%18,90), Arabatik 13 (%10,24), Lapurditik 10 (%7,87), Behe-Nafarroatik 6 (%4,73), Zuberoatik 2  (%1,57) eta diasporatik bat, Cusco, Perukoa (%0,79). Taldearen % 66,93 emakumezkoa da (85 neska), % 32,28 gizonezkoa (41 mutil) eta ez binarioa  % 0,79 (pertsona 1).

            Nondik nora: Oraingoan, 27 herritan pasako dugu gaua, horietatik hiru (beltzez markatuta) berriak: Atharratze, Maule, Pagola, Larzabale, Donibane-Garazi, Auritz, Zubiri, Iruña, Añana, Argantzun, Gasteiz, Izarra, Araia, Zerain, Tolosa, Lesaka, Urdazubi, Baiona, Urruña, Donostia, Zarautz, Lekeitio, Aulesti, Gernika, Bermeo, Bilbo eta Getxo. Hauek eta beste hainbeste herrietatik zeharkatuko du marea laranjak aurtengo udan Euskal Herria.

Uztailak 1ATHARRATZE
Uztailak 2ATHARRATZE – MAULE
Uztailak 3MAULE- PAGOLA
Uztailak 4PAGOLA-LARZABALE
Uztailak 5LARZABALE-DONIBANE GARAZI
Uztailak 6DONIBANE GARAZI- AURITZ
Uztailak 7AURITZ-ZUBIRI
Uztailak 8ZUBIRI-IRUÑA
Uztailak 9IRUÑA-IRULEGI-URROTZ-AÑANA
Uztailak 10AÑANA-ARGANTZON
Uztailak 11ARGANTZON-GASTEIZ
Uztailak 12GASTEIZ
Uztailak 13GASTEIZ-IZARRA
Uztailak 14IZARRA-KAIKU-ARAIA
Uztailak 15ARAIA-ZERAIN
Uztailak 16ZERAIN-BEASAIN-TOLOSA
Uztailak 17TOLOSA
Uztailak 18TOLOSA-OIARTZUN-LESAKA
Uztailak 19LESAKA-URDAZUBI
Uztailak 20URDAZUBI-AMAIUR-BAIONA
Uztailak 21BAIONA- MIARRITZE- URRUÑA
Uztailak 22URRUÑA-DONOSTIA
Uztailak 23DONOSTIA
Uztailak 24DONOSTIA-ZARAUTZ
Uztailak 25ZARAUTZ-DEBA-LEKEITIO
Uztailak 26LEKEITIO-AULESTI
Uztailak 27AULESTI-GERNIKA
Uztailak 28GERNIKA
Uztailak 29GERNIKA-SUKARRIETA-BERMEO
Uztailak 30BERMEO-BAKIO-BILBO
Uztailak 31BILBO-GETXO

            Lantaldea: Gazteekin batera, 30 lagunek osatutako lantaldea joango da: 2 koordinatzaile, 10 xerpa (begirale), 4 xerpa laguntzaile, 2 xerpa buru, 3 mediku, 2 erizain, 2 gidari, euskara teknikari 1, 2 argazkilari, kameralari 1 eta komunikazio arduradun 1.